2022.05.12
Zoologiya İnstitutunda elmlər doktorluğu üzrə dissertasiya işinin ilkin müzakirəsi keçirilib
12 may 2022-ci il tarixində AMEA Zoologiya İnstitutunun Parazitologiya laboratoriyasının aparıcı elmi işçisi b.ü.f.d. Reyhan İbrahimovanın “Azərbaycanda əhli itkimilər (canidae) və pişikkimilərin (felidae) başlıca helmintoz törədiciləri, parazitar ocaqlıqların gis xəritələşdirilməsi, mübarizə tədbirlərinin hazırlanması” mövzusunda elmlər doktorluğu üzrə dissertasiya işinin ilkin müzakirəsi keçirilib.
Dissertasiya işinin elmi rəhbəri AMEA Zoologiya İnstitutunun Parazitologiya laboratoriyasının müdiri, biologiya elmlər doktoru, dosent Qara Fətəliyevdir.
Məruzəçi bildirib ki, aparılan tədqiqat işləri bioekoloji xüsusiyyətlərinə görə bir-birindən kəskin fərqlənən 4 təbii vilayəti əhatə edir (Böyük Qafqaz, Kiçik Qafqaz, Kür dağarası çökəkliyi və Lənkəran təbii vilayəti). Yaxın rayonlar üzrə yayılmış helmintlərin yoluxma ekstensivliyi və intensivliyi bir-birinə yaxın olsa da, böyük vilayətlər üzrə helmintlərin yayılması kəskin fərqli olur. Bu məqsədlə, helmintlərin müxtəlif təbii vilayətlər üzrə əhli itkimi və pişikkimilər arasında fərqli yayılması, fərqlərin və oxşar cəhətlərin yaranmasının səbəbləri müqayisəli təhlil edilmiş, ərazilərdə helmintlərin yayılmasının müqayisəli təhlili zamanı fərqlərin yaranması və oxşar cəhətlərin meydana çıxmasının səbəbləri müəyyən edilmişdir. R. İbrahimova qeyd edib ki, bu, ilk növbədə, ərazilərin bioekoloji xüsusiyyətlərindən - heyvanların sıxlığı, onların qidasını təşkil edən aralıq sahiblərinin ərazilərdə yayılması, parazit-sahib münasibətindən, helmintlərin yumurta və sürfələrinin inkişaf edib invazion hala çatması üçün lazım olan ekoloji amillər, digər tərəfdən də sosial, urbanizasiya və bəzi yerlərdə antropogen amillərin landşaftların strukturuna təsir formalarından asılıdır.
Geniş müzakirələrdən sonra "Azərbaycanda əhli itkimilər (canidae) və pişikkimilərin (felidae) başlıca helmintoz törədiciləri, parazitar ocaqlıqların gis xəritələşdirilməsi, mübarizə tədbirlərinin hazırlanmas" mövzusunda dissertasiya işinin 2429.01 - "Parazitologiya " ixtisasında biologiya elmləri doktoru elmi dərəcəsi almaq üçün Azərbaycan Respublikasının Prezidenti yanında AAK-nın fəlsəfə doktoru dissertasiyaları qarşısında qoyduğu tələblərə cavab verdiyi üçün işin elmi müzakirələrin növbəti mərhələsinə təqdim olunması məqsədəuyğun hesab edilib.
