2019.02.22
Zoologiya İnstitutunun Qadınlar Şurasının təşkilatçılığı ilə Xocalı soyqırımına həsr olunan tədbir keçirilib
AMEA-nın Zoologiya İnstitutunun Qadınlar Şurasının təşkilatçılığı ilə Mərkəzi Elmi Kitabxanada Xocalı soyqırımının 27-ci ildönümünə həsr olunan "Tarixin qan yaddaşı" mövzusunda tədbir keçirilib.
Tədbirdə öncə "Qarabağ Həqiqətlərini Beynəlxalq Aləmə Tanıtma" İB-nin sədri Əlövsət Qasımovun Xocalı faciəsini özündə əks etdirən sərgisinə baxış keçirilib. Sərgidə Ə. Qasımovun “General Əli bəy”-in 1992-ci ildə erməni daşnaqları tərəfindən Xocalıda tanınmaz hala salınmış, başı kəsilmiş, min bir işgəncəyə məruz qalmış soydaşlarımızın hər birinin foto şəklini çəkərək, erməni vandalizmini ifşa edən çox qiymətli tarixi fotosəlnamə yaradıb.
Tədbir Xocalı soyqırımında həlak olanların xatirəsinin bir dəqiqəlik sükutla yad edilməsi ilə başlayıb.
Yığıncaqda institutun direktoru, fizika-riyaziyyat elmləri üzrə fəlsəfə doktoru, dosent Elman Yusifov çıxış edərək 27 il əvvəl ermənilərin keçmiş sovet hərbçilərinin köməyi ilə Xocalıda xalqımıza qarşı törətdikləri soyqırımı bəşər tarixinin ən dəhşətli cinayətlərindən biri kimi qiymətləndirib, məhz ümummilli lider Heydər Əliyev tərəfindən bu qanlı cinayətə siyasi və hüquqi qiymətin verildiyini diqqətə çatdırıb. O, xalqımıza qarşı törədilən qətliamların dünya ictimaiyyətinin diqqətinə çatdırılmasında Prezident İlham Əliyevin və Heydər Əliyev Fondunun əvəzsiz xidmətlərindən danışıb. E.Yusifov azərbaycanlılara qarşı həyata keçirilmiş soyqırımı və deportasiyaların tarixinə nəzər salaraq bildirib ki, qan yaddaşımıza çevrilmiş bu hadisə unudulmamalı, soyqırımı qurbanlarının xatirəsi qəlbimizdə əbədi yaşamalıdır.
Sonra çıxış edən Zoologiya İnstitutunun Qadınlar Şurasının sədri, b.ü.f.d., dosent Yeganə Mahmudova Azərbaycanın xarici siyasətində Xocalı soyqırımının beynəlxalq ictimaiyyət tərəfindən tanınmasına dair mühüm işlərin aparıldığını deyib. O, “Xocalıya ədalət!” beynəlxalq təbliğat və maarifləndirmə kompaniyasının bu soyqırımı dünyada tanınmasının əhəmiyyətindən danışıb. Y.Mahmudova dünyada 2 ölkənin Xocalıda baş verənləri soyqırımı, 11 ölkənin, o cümlədən ABŞ-ın 22 ştatının isə qətliam kimi tanıdığını qeyd edib.
Bununla yanaşı tədbirdə AMEA-nın Qadınlar Şurasının sədri, professor Rəna Mirzəzadə, "Qarabağ Həqiqətlərini Beynəlxalq Aləmə Tanıtma" İB-nin sədri Əlövsət Qasımov, BMT yanında İnsan Haqları Bürosunun Beynəlxalq Əlaqələr Departamentinin sədr müavini Firdovsi Ələkbərov, Beynəlxalq Diaspor Mərkəzinin sədri, BMT yanında İnsan Haqları Bürosunun Azərbaycan üzrə komissarı İsmayıl Ağayev, Çexiya-Azərbaycan ticarət palatasının sədri Zaməddin Musayev, Zoologiya İnstitutunun şöbə müdiri, b.ü.f.d., dosent Adil Əliyev, aparıcı elmi işçisi, b.ü.f.d., dosent Təvəkkül İsgəndərov, elmi işçi Sevinc Rəcəbova və digərləri çıxış edərək Xocalı hadisələrinin beynəlxalq terror aktı olduğunu vurğulayaraq, bu hadisənin günahkarlarının layiqli cəzalarını alacaqlarına əminliklərini ifadə ediblər.
Sonda Xocalı soyqırımına həsr olunan "Qəzəb" filmi nümayiş etdirilib.
